من شهرين حكايات رومانى مكرم 3
عادل ضحك بأعلى صوته وقال بلؤم: “ومين اللي هيصدق يا حلوة؟ أخوكي مات وسركوا معاه تحت التراب.. الأوراق اللي معايا مختومة وموثقة من ٢٠ سنة، والمحاكم مبتعترفش غير بالورق.. أنا هاخد الشقة والفلوس، وهرميكي في الشارع زي ما أبوكي رماني زمان.. اخلصي ومضي هنا!”
طلعت الموبايل من جيب الجاكيت، وبصيت له بابتسامة نصر هزت كيانه، وقولت له: “المحاكم مابتسمعش.. بس النيابة بتشوف.. التسجيل ده لايف يا عمي، والمحامي بتاعي برة ومعاه الفلاشة الأصلية اللي أبويا شالها لليوم ده.. الفلاشة اللي عليها قض..ية التزوير القديمة واعترافاتك وصوتك وأنت بتبتزه.. والشرطة برة محاصرة المكان باللايف اللي شغال دلوقتي!”
عادل وشه اتفرد من الصدمة، وعينيه برقت برعب وبص لرجاله وقال: “هاتوا الموبايل ده! اخلصوا!”
في اللحظة دي، وقبل ما حد من رجاله يتحرك خطوة واحدة، الباب الحديدي للمخزن اتكسر ودخلت قوة من الشرطة ورجال المباحث وصوت السارينات ملأ المكان.. “اثبت مكانك منك له! الشرطة محاصرة المكان!”
الدنيا اتقلبت في ثواني.. رجالة عادل رموا الس..لاح ورفعوا إيديهم، وعادل وقع على ركبه وهو مش مصدق إن البنت اللي كان فاكرها صيد سهل، دمرت تاريخه كله في لحظة واحدة.
المحامي دخل وفك قيد كريم، اللي كان بيبص لي بنظرة ذهول وندم وكسرة مكسرتش راجل قبله.. حماتي خدته في حضنها وهي بتعيط، وكريم بصلي وشفايفه بتترعش: “ندى.. أنا..”
قاطعته وأنا بدير ضهري وببص للظابط وهو بيقيد إيدين عمي عادل بالحديد، وقولت لكريم ببرود التمساح: “أنا منقذتكش عشان سواد عيونك يا كريم.. أنا أنقذت نفسي وأنقذت اسم أبويا.. إنت خلاص صفحة واتقفت من حياتي، والكلب اللي بعتني عشان قرشين، أهو جه اللي ألعن منه وباعه وباع أهله.”
التفت ومشيت خطوتين، بس الظابط وقفني وقال: “يا مدام ندى، عمك عادل اتقبض عليه بتهمة الخطف والترويع وقض..ية التزوير القديمة.. بس بالنسبة للأوراق التنازل والشيك اللي مع حضرتك ضد كريم؟”
بصيت لكريم ولأمه، وطلعت الشيك اللي بمليون ونص من الشنطة.. وقطعته مية حتة قدام عيونهم ورميته في الهواء.. وقولت: “أنا مبخدش حق مش حقي.. التنازل عن الشقة والمنقولات والطلاق اللي ممضي عليهم إمبارح كافيين يرجعوا لي حقي وحق أبويا.. أنا مش زيهم.. أنا بنت أصول.”
خرجت من المخزن المهجور، الهوا البارد لمس وشي.. حسيت لأول مرة إن النَفَس بيدخل وبيضخ حياة جديدة في عروقي. ركبت عربية المحامي، وبصيت من الشباك على النجوم اللي في السما..
