جوزي عمره حكايات رومانى مكرم 2
## الجزء الثالث: رقصة المذبوح
الليل مابقاش يمر عليا تقيل زي زمان؛ بالعكس، بقى يمر هادي وناعم وأنا بتابع من بعيد إزاي حصون أحمد اللي بناها على حساب كرامتي وصحتي عمالة تنهار حجر ورا حجر.
تاني يوم الصبح، الساعة كانت 9:00 بالتمام، تليفوني رن. المرة دي مكنش أحمد، كان المحامي بتاعي، الأستاذ رفعت. صوته كان فيه نبرة انتصار هادية تليق بمحامي مخضرم:
“مبروك يا مدام مريم، قوة تنفيذ الأحكام ومعاهم محضر المحكمة واقفين دلوقتي تحت البرج، ومعاهم أمر طرد صريح للحرس والساكنين، والحجز على المنقولات تم بناءً على صيغة الشيكات التنفيذية. البشمهندس أحمد واقف في الشارع بالترينج وبيحاول يكلم أي حد يلحقه، والعروسة الجديدة نازلة بشنطة هدمها وبتصوت.”
أخدت نفس طويل، وقولتله:
“تابع التنفيذ يا أستاذ رفعت، ومش عايزة أي تهاون أو تأجيل تحت أي مسمى. اللي يرمي ست في المستشفى وهي بين الحياة والموت عشان يوفر تمن سرير، م يستحقش حتى نظرة عطف.”
### الانكسار خلف الأبواب المغلقة
على العصر، لقيت رقم غريب بيرن عليا. رديت وأنا عارفة كويس مين اللي هيكون ورا الرقم ده بعد ما عملت بلوك لأحمد وليلى من كل حتة.
كان صوت والدة أحمد، حماتي السابقة. الست اللي كانت دايماً تبصلي من فوق لتحت وكأني حتة دبلة صفيح في إيد ابنها الصائغ. صوفيا هانم، اللي كانت بتعايرني إني “قاعدة في البيت ومابتجيبلش قرش ينفعه”.
صوتها كان مكسور، مفيش فيه النبرة الحادة بتاعة زمان:
“كده يا مريم؟ ده العيش والملح؟ يرضيكي ابن طنطك صوفيا يتبهدل في الشوارع والناس تتفرج عليه؟ إحنا غلطنا يا بنتي، وأحمد طاش وراه واحدة خطفته مننا ومنك، بس مش لدرجة تخربوا بيوت بعض وتفضحونا في الحتة!”
ضحكت بسخرية مكنتش قادرة أداريها:
“طنط صوفيا.. أهلاً بحضرتك. العيش والملح ده أحمد رماه في باسكت الزبالة بتاع المستشفى وهو بيرميلي ورقة الطلاق وأنا لسه متبنجة. وأحمد مطاش لوحده، أحمد كان مرتب ومخطط وراسم بالمسطرة، بس خانته الحسبة. أما بخصوص الفضيحة.. فابنك هو اللي اختار يفرش فرحه الأسطوري في المنطقة بعد أسبوعين من طلاقي عشان يكسرني، فميزعلش بقا لما الناس تتفرج على باقي المسرحية.”
قفلت السكة في وشها قبل ما تسمع مني كلمة زيادة. القوة اللي في صوتهما دلوقتي مش جاية من فراغ، جاية من 750 ألف جنيه كنت بكسبهم بعرقي وفكري، من حقي اللي ربنا ادهوني لما وثقت في نفسي ومستسلمتش لجرعات الإحباط اللي كانوا بيدوهالي كل يوم.
