أنا وبنت خالتي ولدنا في يوم واحد 3
ـ اقفلي الباب على نفسك أنتِ والولاد يا فادية، أنا نازل لولاد المنشاوي دول.. البيت ده فيه رجالة، ومحدش هيكسر هيبتنا ولا هياخد عيل من هنا بالعافية!
مسكت إيد كريم وقفت في وشّه وقلت له بثبات:
ـ مش كريم اللي ينزل لوحده، والدم مش هيحل حاجة يا كريم. أخوات منال جايين بغلّهم وعماهم فاكرين إننا بنتبلى على أختهم عشان نسرق ورث مدحت.. هما مش فاهمين الحقيقة.
طلعت البلكونة وبصيت عليهم.. كانوا خمس رجالة، ومعاهم منال واقفة في وسطهم وشعرها منكوش وبتصرخ وتقول: “خربوا بيتي يا اخواتي! اتهروني في شرفي وعايزين ياخدوا شقا جوزي وعيالي!”. الجيران بدأت تفتح الشبابيك، والشارع كله اتملى ناس بتفرج على الفضيحة.
زعقت بأعلى صوتي من البلكونة:
ـ يا منشاوي! أنت وأخواتك.. اسمعوا الكلمة دي، بدل ما تدخلوا السجن بتهمة هجوم وبلطجة! أختكم منال متبلّيناش عليها.. أختكم غشّتكم وغشّت جوزها من ١٨ سنة، والتحاليل والشرطة هما اللي هيفصلوا.. لو راجل فيكم فيه عقل، يلم حريمه ويطلع يقعد ويسمع، وبلاش قلة قيمة قدام الناس!
كلامي وثقتي خلّت الأخ الكبير، “حامد المنشاوي”، يبص لإخواته ويشاور لهم يهدوا. حامد كان راجل عاقل وتجرته كبيرة ومبيحبش المشاكل اللي مالهاش عازة. بص لي وزعق:
ـ هنطلع يا أم يوسف.. بس لو طلع كلامك تلاكيك وعايزة تخربي بيت أختي، ليلتكم مش هتعدي!
دقايق والباب خبط. كريم فتح وهو ماسك عصايته، ودخل حامد واتنين من إخواته، ومعاهم منال اللي كانت بتبص لي بغل وتعيط بتمثيل. أول ما دخلوا، حامد بص ليوسف اللي قاعد منكمش، وبص لمروان اللي واقف بكل عزة نفس.
قعد حامد وقال بغلظة:
ـ هاتي اللي عندك يا فادية.. إيه حكاية التبديل دي اللي جاية تقوليها بعد ١٨ سنة؟ أنتِ واعية للكلام ده معناه إيه في الأصول والقانون؟
طلعت الملف، وحطيته قدامه على الترابيزة، وقلت له:
ـ الكلام ده معناه إن أختك ليلة ما ولدنا، بدلت العيال عشان تاخد ابني وتديني ابنها اللي كان نازل ضعيف وهزيل. ومن يومها وهي بتدلع ابنها اللي فاكراه ابني، وبتذل ابني اللي فاكراه ابنها.. الورق ده فيه شهادات المستشفى، وبلاغ رسمي أنا لسه مقدماه أونلاين للنيابة العامة بطلب تحليل (DNA) رسمي للولاد.. وأنا مش هحكي كتير، أختك اهي قدامك.. اسألها يا حامد، اسألها عن شكل غوايش المستشفى اللي اتغيرت، اسألها عن ليلة المستشفى المشؤومة!
حامد التفت لمنال، وعيونه بقت زي الجمر:
ـ الكلام ده صح يا منال؟ أنتِ عملتِ العملة السودة دي؟
