بعد طلاقي حكايات زهره1
بعد طلاقي 3 شهور لما عرف طليقي اني حامل قالي بكل برود اللي في بطنك مش ابني اتخلصي منه بدل ما افضحك…انا فرحي بعد اسبوع ومش عايز مشاكل…ولما شافه بهد ست سنين كان هيوقع من طوله
بعد تلت شهور من طلاقي كنت حاطة التليفون على ودني، وصوت الرنة بياكل في أعصابي.. رن تلات مرات لحد ما رد.
“عمر” فتح الخط.. من غير حتى ما يقول “ألو” أو “سلام عليكم”.
قلت وانا بعيط: “عمر انا ..أنا طلعت حامل.”
وسكت ثانية وتابعت: “لسه خارجه من عند الدكتور واكدلي ؟”
الناحية التانية من الخط غرق في سكوت تام لمدة تلات ثواني..
مبنتش عليها حيرة أو تردد.. لأ، ده كان سكوت الموت اللي بيسبق العاصفة.
وبعدها سمعت ضحكة خفيفة منه.. ضحكة باردة زي التلج، حستها زي الموس اللي بيجرح في قلبي.
”جرى إيه يا فريدة؟ الهزار ده بايخ قوي ومش وقته خالص.”
“إحنا بقالنا تلات شهور متطلقين.. جاية تقوليلي حامل دلوقتي؟”
وبنبرة تانية خالص، نبرة تذبح، قال: “ابن مين ده؟”
الكلمتين دول نزلوا على ودني زي الصاعقة..
ضغطت بأصابع بيترعشوا على ورقة التحاليل اللي في إيدي، لدرجة إن كف إيدي عرق والورقة اتكرمشت تماماً.
”انت بتستهبل …انا حامل في اربع شهور يعني من قبل ما نتطلق حافظ على كلامك؟!”
ضحك تاني، بس المرة دي الضحكة كانت عالية وساخرة:
“إنتي نسيتي ولا إيه؟ فاكرة لما أخدتك وروقنا وعملنا تحاليل قبل الجواز عشان نطمن؟”
“فاكرة الدكتورة قالت إيه.. ولا الذاكرة خانتك؟”
دماغي لفت، وبقيت مش مجمعة.. تحاليل قبل الجواز..
آه، فعلا حصل.. وقتها قالي إن أهله مستعجلين على الجواز ولازم نعمل الفحوصات دي، ويوم ما استلم النتيجة كان وشه مقلوب، وقالي “حاجة بسيطة ومتشغليش بالك”. وأنا زي الهبلة صدقته ومفتشتش وراه.
صوته رجعني للواقع وهو بيقول بقسوة:
“الدكتورة قالتلي إني مابخلفش.. يعني أنا عمري ما هجيب عيل من صُلبي يا فريدة.”
“فـ قوليلي بقى.. اللي في بطنك ده.. ابن حرام ومين أبوه؟!”
ابن حرام؟!
الكلمة دبحتني، وحسيت إن قلبي اتعصر وبقى ميت ومبقاش حتى فيا حيل للوجع.
سنان بتخبط في بعضها من الصدمة..
يعني “الحاجة البسيطة” اللي قال عليها كانت دي؟
يعني قبل يتجوزني وهو مخبي عني حاجه تخصني بالشكل ده
صوته رجع لطبيعته، بارد ومستقر كأنه بيناقش بيعة وشروة في الشغل:
“حدنا لحد هنا، وكل حي يروح لحاله.”
“وعشان خاطر العشرة والتلات سنين اللي فاتوا، بنصحك تنزلي البتاع ده بأسرع وقت ونظفي وراكي.”
“ومشوفش وشك تاني، ولا تتصلي بالرقم ده.”
