فرامل عربيتي حكايات زهرة 4
الورقة اللي في إيدي كانت عبارة عن عقد بيع وشراء ابتدائي لشقتي.. شقتي اللي بابا الله يرحمه كتبها باسمي قبل ما يموت عشان تأمن مستقبلي.
العقد كان مكتوب فيه إنني بعت الشقة لشريف بمبلغ خيالي، وممضي تحت في خانة البائع باسمي.. “منة”. الإمضاء كان متقن جداً، لدرجة إني لو مش متأكدة إني ممضيتش، كنت هقول ده خطي!
بس الصدمة الحقيقية مكنتش في تزوير إمضائي.. الصدمة كانت في خانة “الشهود” تحت. كان فيه اسمين؛ الاسم الأول كان “رنا”.. والاسم الثاني كان صدمة عمري اللي خلت ركبي تخبط في بعضها ومبقتش قادرة أقف على رجلي.
الاسم كان: **”ميّار أحمد”**.. صاحبة عمري!
ميّار؟ صاحبتي الأنتيم اللي متربية معايا من الابتدائي؟ اللي كانت بتدخل بيتي وأسراري كلها معاها؟
شريط الذكريات لَف في دماغي في ثانية.. افتكرت كلامها ليا دايماً: *”يا بختك يا منة، وقعتي واقفة وجوزك بيعشق تراب رجليكي”*.. وافتكرت لما كانت بتزن عليا وتقولي: *”هو شريف مش ناوي يغير عربيتك بقا؟ تلات سنين كتير عليها يا بنتي، اطلبي منه يجددها”*..
كانت بتقول الكلمات دي بسمّ.. كانت عارفة الخطة! كانت بتسوقني برجلي للموت وهي بتضحك في وشي!
مسكت التليفون وإيدي بتترعش من الغل، وطلبت المحامي بتاعي فوراً:
“أستاذ هاني.. أنا لقيت ورقة في حاجة شريف.. عقد بيع مزور للشقة، وفيه اسم شاهدة ثانية لازم تتجاب فوراً في القضية.. صاحبتي ميّار.”
المحامي صوته اتغير وقال لي بحسم: “امدحي ربنا يا مدام منة إن الورقة دي وقعت في إيدك.. دي كنز قانوني يثبت نية القتل العمد بغرض السرقة والتزوير. هاتي الورقة وتكالي على الله تعالي على النيابة فوراً، أنا هطلب استدعاء للمشكو في حقها.”
نزلت من البيت كأن فيا طاقة مية راجل.. الوجع اتقلبت لـ غضب أعمى. رحت النيابة وقدمت الورقة، ووكيل النيابة أمر فوراً بضبط وإحضار ميّار أحمد كشريكة في التزوير والتستر على جناية شروع في قتل.
ساعتين بالظبط، وكنت قاعدة في طرقة النيابة، ولمحت بوكس الشرطة وهو نازل منه ميّار.
وشها كان جايب ألوان، وبتعيط ومنهارة، وأول ما عيناها جت في عيني، صرخت وجريت عليا وهي مكلبشة:
“منة! وحياة غلاوة عشرتنا ماليش ذنب! شريف هو اللي هددني! قالي لو ممضيتيش شاهدة هفضحك وهقول لخطيبك على حاجات قديمة.. والله العظيم ما كنت أعرف إنه هيقطع الفرامل! أنا كنت فاكرة إنه هيطلقك وياخد الشقة بس!”
بصيت لها من فوق لتحت بقرف، زقيت إيدها المكلبشة بعيد عني وقولت لها بصوت حاد ومسموع للكل:
