أوضة المستشفى حكايات رومانى مكرم 2
بابا محمود مد إيده، أخد الشنطة، وفتحها اتأكد من الفلوس، وبعدين حطها ورا ضهره وبص للظابط والمحامي اللي كانوا واقفين ورا الستارة في الأوضة ودخلوا فجأة!
المحامي طلع ورق رسمي وقال بصوت عالي: “الـ 600 ألف جنيه دول هينضموا لملف القضية كإثبات رد مبالغ مستولى عليها، وده اعتراف ضمني منكم بالجريمة. أما بخصوص التوكيل العام اللي طارق استخدمه لبيع العفش والشقة، فالحاج محمود أقام دعوى حجر وإلغاء لكافة التوكيلات من أسبوع كامل، بعد ما البنك بلغه بالشكوك في السحب، يعني أي بيع أو تصرف عمله طارق بعد التاريخ ده هو باطل قانوناً، وهيضاف للقضية بتهمة تبديد أموال ونصب جديدة!”
الحاجة كريمة وبناتها صرخوا، وأحمد أخو طارق وشه جاب ألوان وبقى يبص حوليه زي الفار المحبوس.
بابا محمود قرب من الحاجة كريمة وقالها بلهجة تزلزل: “ابنك مش هيخرج يا كريمة. ابنك هيلبس البدلة الزرقا، والشقة اللي بتقولي باعها، المحضر هينزل يطرد صاحبكم منها بكرة الصبح لأنها محجوزة كنفقة متعة ومؤخر لبنتي. واعلمي إن ابن بنتي مش هيشوف وشكم، والـ 600 ألف دول يادوب تمن مصاريف المستشفى والبهدلة اللي بنتي شافتها.”
الظابط أشار لأفراد الأمن اللي جم معاه، وبدأوا يسحبوا إخوات طارق والحاجة كريمة برة الأوضة وهما بيشتموا ويصوتوا ويهددوا بالانتقام.
لما الأوضة فضيت، بابا قعد جمبي وأخد محمود الصغير في حضنه وباسه، وقاللي: “خلاص يا بنتي، ضهرهم انكسر، والقانون جاب حقك تالت ومتلت. طارق خلاص انتهى.”
لكن وأنا ببص على الباب اللي اتقفل، حسيت إن طارق مش هيستسلم بالسهولة دي.. طارق بني آدم مريض بالفلوس، والشر اللي في عين أمه وإخواته بيقول إن الجولة الجاية مش هتبقى في المحاكم.. هتبقى مواجهة مباشرة وممكن تكون أخطر بكتير.
حكايات رومانى مكرم تابعو صفحه رومانى مكرم
بعد مرور أسبوعين، خرجت من المستشفى ورجعت مع بابا لبيته الكبير؛ البيت اللي عشت فيه ملكة قبل ما طارق يدخل حياتي ويوهمني إن الدنيا ضيقة وسودا. بابا مسبنيش لحظة، جابلي ممرضة تساعدني في رعاية محمود الصغير، وحرّاس على باب البيت لأننا كنا عارفين إن عيلة طارق مش هتهدا بعد ما طارق اتجدد حبسه 15 يوم على ذمة التحقيق، وبقت قضية التزوير والنصب لابة في المحاكم والكل بيتكلم عنها.
في يوم، كنت قاعدة في الصالة بهز السرير بتاع محمود، وبابا كان نازل يقابل المحامي عشان يتابع إجراءات قضية الطلاق والنفقة اللي رفعناها. فجأة، لقيت تليفوني بيرن برقم غريب. قلبي انقبض، بس رديت.
