أوضة المستشفى حكايات رومانى مكرم 2
الحاجة كريمة وقفت في نص الأوضة، وحطت إيدها في وسطها وقالت بصوت جهوري: “أهو.. الهانم قاعدة في التكييف وبتاكل المحمر والمشمر، وابني حشاشة قِلبى بايت في الحجز وسط المجرمين! يرضي مين ده يا ناس؟”
بابا محمود كان واقف في بلكونة الأوضة بيتكلم في التليفون، أول ما سمع صوتها دخل وقفل الباب وراه، ووقف قدامهم زي السد المنيع: “أنتِ إيه اللي جابك هنا يا ست أنتِ؟ وإزاي تدخلوا الأوضة بالهمجية دي؟ اطلعي برة قبل ما اطلب الأمن يرميكم في الشارع.”
واحد من إخوات طارق، اسمه أحمد، قرب من بابا وقال بنبرة تهديد: “جرى إيه يا حاج محمود؟ إحنا جايين بالذوق عشان نلم الدور. طارق ابننا ومش هنسيبه يتسجن في تهمة متفصلة عشان شوية فلوس. الفلوس موجودة والشنط والساعات أهي رجعناها للمحل وأخدنا الفلوس كاش.. الـ 600 ألف جنيه جاهزين في الشنطة دي، بس بنتك تتنازل عن القضية حالا، وطارق يطلقها ويرميها بالطفل بتاعها ده في الشارع!”
سمعت كلمة “يطلقها” وقلبي دق بسرعة، بس مكنش خوف، كان إحساس بالحرية. لكن الحاجة كريمة كملت بخبث: “آه.. يطلقها، بس الواد ده مش هتشوفه! ده ابن طارق ويحمل اسمه، والشرع والقانون يدولنا الحق فيه بعد الرضاعة، وإحنا مش هنسيب حتة من لحمنا للي سجنوا أبوه!”
الكلام كان زي الخنجر في صدري. ضَميت ابني لقلبي وبقيت بترعش، وصرخت فيهم: “ابني مش هتاخدوه لو على رقبتي! طارق نصاب ومزور، وأنا مش هسيب حقي ولا حق ابني.”
الحاجة كريمة ضحكت بسخرية وقالت: “بقى كده يا بنت محمود؟ طب وحياة حرقة قلبي على ابني، لـ ندمك. الشقة اللي كنتِ قاعدة فيها، العفش اللي فيها كله طارق باعه الصبح بتوكيل منك.. آه، متبرقيش كده! التوكيل العام اللي كنتِ مَضياله عليه أول الجواز عشان يخلصليكِ ورق الإجازة من المدرسة، استخدمه وباع الشقة والعفش لواحد صاحبنا، يعني مالكيش حتى هدوم تاخديها من هناك. هدومك وقشّك في الشارع يا هنا!”
الدنيا لفت بيا.. طارق مسبش حاجة إلا وسرقها، حتى عفش بيتي وهدومي!
بابا محمود بص للحاجة كريمة وإخوات طارق، ووشه هدي تماماً، الهدوء اللي بيسبق العاصفة، وقال لأحمد أخو طارق: “الـ 600 ألف جنيه اللي في الشنطة دول، تمن الفلوس اللي طارق زورها من حساب بنتي.. حط الشنطة هنا على التربيزة.”
أحمد افتكر إن بابا خاف، وحط الشنطة وهو مبتسم بانتصار: “أهو.. كده تعجبني، شغل عقل وبلاش فضايح، يالا يا هنا، المتر برة مجهز ورقة التنازل، امضي عشان طارق يخرج.”
