جوزي ومرات حكايات رومانى مكرم 2
أول ما عينيهم جت في عيني، كريم نزلت دموعه وبدأ يحرك شفايفه بكلمة “سامحيني”، أما نادين فدارت وشها الناحية التانية وهي بتترعش.
وقف المحامي بتاعي وقدم القنبلة الأخيرة والمفاجأة اللي كنت شايلاها للجلسة دي… “تقرير الخبير المالي والمصرفي وتتبع الحسابات”.
المفاجأة مكنتش بس في العقود اللي زوروها، المفاجأة إن التتبع أثبت إن كريم ونادين كانوا بيسرقوا من حسابات تانية تخص شركات وعمليات تانية، وإن كريم كان واخد قروض بضمانات مزورة باسمي وباسم عيلتي. والأهم من ده، قدمنا للمحكمة مستندات رسمية من الشهر العقاري تثبت إن كل الأملاك اللي كريم حاول يبيعها لنادين، أنا كنت نقلت ملكيتها لـ نفسي ولـ حسام قبل الحادثة بأسبوع بالظبط، بعد ما شكيت في تصرفاته وراقبت موبايله!
يعني العقود اللي كانت مع نادين في الشنطة، واللي كريم مضى عليها، كانت عقود لـ ممتلكات “غير موجودة” في حوزته أصلاً.. هما كانوا بيسرقوا وهم، وبيجروا ورا سراب!
القاضي خبط بالشاكوش، وساد الصمت التام في القاعة، وبدأ ينطق بالحكم:
“حكمت المحكمة حضورياً.. أولاً: بمعاقبة المتهم كريم بالسجن المشدد لمدة سبع سنوات، بتهم التزوير في محررات رسمية، والسرقة، والنصب والاحتيال. ثانياً: بمعاقبة المتهمة نادين بالسجن المشدد لمدة خمس سنوات، بتهمة الاشتراك في التزوير والنصب، وبسقوط حقوقها الشرعية تتبعاً لقض*ية الزنا.”
صوت الشاكوش نزل على دماغهم زي الصاعقة. نادين صرخت صرخة مكتومة ووقعت في الأرض بتعيط بـ هستيريا، وكريم مسك في الحديد وبدأ يصرخ: “يا سيادة القاضي أنا اضحك عليا.. سارة ضيعتيني!”
بصيت لهم للمرة الأخيرة وهم العساكر بيشدوهم بالكلابشات عشان يرحلوهم على السجن. مكنش جوايا أي شماتة، كان جوايا سلام نفسي رهيب. العدالة مكنتش بس في حكم القاضي، العدالة بدأت من اللحظة اللي ربنا جابهم فيها لحد عندي في الطوارئ متغطيين بدمهم، عشان أكون أنا السبب في نجاتهم.. وفي سجنهم.
خرجت من باب المحكمة، والشمس كانت حامية ومالية المكان. نفضت البالطو بتاعي اللي كنت شايلاه على إيدي، وبصيت لحسام وقلتله: “يلا يا حسام.. ليلتنا الطويلة خلصت، والنهار الجديد بدأ.”
ركبت عربيتي وتحركت، وأنا عارفة إن الدرس كان قاسي، بس علمني إن المشرط اللي بيشفي الجروح، ساعات بيكون هو نفسه الأداة اللي بتبتر الخيانة من الجذور.
#الكاتب_رومانى_مكرم
