جوزي ومرات حكايات رومانى مكرم 2
أما أبو كريم، فوقف قدام ابنه وهو بيموت من الخزي، وبصلي ودموعه في عينه: “سامحينا يا بنتي.. حقك عليا أنا.. ده واطي وميسواش.”
كريم بدأ ينهار ويبكي بـ هستيريا، وبص لوكيل النيابة وقال بصوت متقطع: “يا فندم أنا مكنتش في وعيي.. هي اللي وزتني، نادين هي اللي قالتلي سارة معاها فلوس كتير ومش هتحس، وهي اللي طلبت نبيع كل حاجة ونهرب برة مصر ونبدأ من جديد!”
نادين سمعت كلامه وصوتها طلع بصرة مرعبة: “أنا يا واطي؟ أنت اللي كنت بتشتكي من عيشتك معاها وتقولي دي دكتورة باردة وشايفة نفسها، وأنت اللي خططت لكل حاجة!”
بدأوا يقطعوا في بعض قدام وكيل النيابة، يرموا التهم على بعض زي الكلاب، وكل واحد فيهم بيحاول ينجي برقبته على حساب التاني. الخيانة اللي بنوها في الضلمة، كانت بتتفضح وبتتفتت في نور النيابة وبألسنتهم هما.
أنا وحسام كنا واقفين بعيد، بنتابع المشهد ببرود تام. حسام كان باصص للأرض وعينيه مكسورة، بس جواه نار بدأت تهدأ وهو شايف حقه بيتاخد تالت ومتلت.
وكيل النيابة خبط على المكتب وقال بحسم: “بس أنتوا الاتنين! الكلام ده تقوله في المحكمة.” وبص لـ سكرتير الجلسة وقاله: “يُحبس المتهم كريم والمتهمة نادين أربعة أيام على ذمة التحقيق، مع مراعاة حالتهم الصحية في حجز المستشفى التابع للسجن.”
أول ما سمعوا كلمة “حبس”، نادين أغمى عليها في مكانها، وكريم بدأ يصوت ويقول: “أبوس إيدكم بلاش السجن.. سارة اتنزلي يا سارة!”
بصيت له بكل ثقة، وقربت من القفص اللي كانوا واقفين وراه قبل ما يرحلوهم، وقلتله بصوت واطي وواضح: “التنازل ده للناس المحترمة يا كريم… أنت ونادين مكانكم جوة، ولسه في مفاجأة أخيرة في الجلسة الجاية، المفاجأة اللي هتقضي عليكم تماماً.”
بعد مرور ستة أشهر، كانت الجلسة النطق بالحكم في محكمة الجنايات.
دخلت القاعة وأنا لابسة فستان أسود أنيق، رافعة راسي، وكل خطواتي بثقة. قعدت في الصف الأول وجنبي حسام أخويا اللي ملامحه رجع لها الهدوء بعد ما طلق نادين طلقة بائنة في أول أسبوع بعد الفضيحة.
على الجانب التاني، كانت عائلاتهم قاعدة، بس المرة دي مكنش في عياط ولا عتاب، كان في نظرات كسرة وخزي من المجتمع والناس بعد ما القصة بقت على كل لسان.
اتفتحت النظارة ودخلوا كريم ونادين… مظهرهم كان يصعب على الكافر. كريم خس نص وزنه، لابس بدلة الحبس البيضا، وماشي بيعرج برجليه من أثر الكسور اللي ملحمتش صح في السجن. ونادين وشها كان باين فيه أثر تشوه واضح مكان الخياطة اللي فتحت، وعينيها مطفية ومليانة رعب.
