الورث حكايات رومانى مكرم 3
بعد ما بعتّ الرسالة لمدحت، قفلت التليفون وخدت نفس عميق. كنت فاكرة إن الموضوع انتهى لحد هنا، وإن مدحت هيستسلم للأمر الواقع، بس الطمع لما بيموتش في قلوب بني آدم، بيخليهم يعملوا أي حاجة عشان ينتقموا.
مر أسبوعين، والهدوء كان هدوء ما قبل العاصفة. كنت بنزل الصبح أودي عيالي النادي وأرجع، وبحاول أعيش حياتي طبيعي، لحد ما في يوم وأنا راجعة، لقيت الباب الخارجي للعمارة مفتوح بشكل غريب. طلعت شقتي، وبمجرد ما حطيت المفتاح في الباب، حسيت إن في حركة جوة.
فتحت الباب ببطء وقلبي بيدق، وفجأة لقيت مدحت واقف في الصالة، ومعاه راجل غريب لابس بدلة ومعاهم شنط سفر كبيرة!
بصيتله بذهول وقولتله:
— “أنت دخلت هنا إزاي؟ والراجل ده مين؟ أنا معايا قرار تمكين من الشقة!”
مدحت ضحك ضحكة مستفزة كلها شماتة، وقعد حاطط رجل على رجل وقال بنبرة ثقة هزتني:
— “ورقة التمكين دي بليها واشربي ميتها يا سمر. الشقة دي من النهاردة مبقتش ملكي عشان تـتمكني منها.. الشقة دي أنا بعتها للأستاذ اللي واقف ده، بقعد بيع وشراء رسمي ومسجل، وقبضت تمنها كاش. يعني الأستاذ هو المالك الجديد، وجاي يستلم شقته، وقدامك بالظبط ساعتين تلمي هدمك أنتي وعيالك وتفضوا المكان، وإلا هجيبلك الشرطة تطردك لأنك قاعدة في ملك غيرك!”
الدنيا لفت بيا، وحسيت إن الأرض بتهرب من تحت رجلي. بيعي العيال؟ يبيع الشقة اللي كبروا فيها عشان يلوى دراعي وينتقم مني؟ الراجل المشتري اتكلم ببرود وقال:
— “يا مدام أنا ماليش دعوة بمشاكلكم الزوجية، أنا اشتريت قانوني وبفلوسي، ومعايا عقد وصيغة تنفيذية، ومحتاج أستلم شقتي.”
طلعت تليفوني وأنا إيدي بتتفض تماماً، وطلبت المحامي بتاعي وأنا بعيط وبصرخ:
— “الحقني يا متر.. مدحت باع الشقة وجايب المشتري وعاوز يطردني أنا والعيال في الشارع حالا!”
المحامي قالي بلهجة حاسمة وسريعة:
— “اهدي يا سمر ومتخافيش، ومتلمسيش شنطة واحدة. ده بيع صوري عشان يهرب من التمكين. اقفلي الباب عليكي ومتسمحيش للمشتري يدخل العفش، وأنا مسافة السكة وأكون عندك ومعايا قوة من القسم.”
قفلت مع المحامي، وبصيت لمدحت وقولتله وأنا واقفة سدة الممر لغرف الأطفال:
— “مش هتحرك من هنا يا مدحت، وأعلى ما في خيلك وخيل المشتري بتاعك اركبوه. المحامي جاي وجايب الشرطة معاه، وهنشوف العقد الصوري ده هيوديكم على فين.”
مدحت وشه اتغير لما لقى إني منهرتش ووافقت على الطرد، وبدأ يتوتر ويبص للمشتري. المشتري نفسه بدا يقلق وقال:
