حكايات اسما السيد 1
في حفل سبوع ابن زميلة جوزي سمعته بيهمسلها بالألماني: “الولد ده هيورث كل حاجة” وكان فاكر إني مش فاهمة ولا كلمة من اللي بيقولها لكن اللي ماكانش يعرفه اني افضل منه ومنها وفاهمه كل شيء وقررت انتقـ م
أول مرة سمعت جوزي بيهمس لطفل ست تانية بمستقبلنا كله كان واقف مبتسم تحت قوس ضخم من الورود البيضاء ماسك كاس عصير فاخر وكأنه ما دفنش جوازنا حالًا بلغة أجنبية
السبوع كان متعمل في قاعة فخمة بأحد الفنادق المطلة على النيل…
المكان كله كان بيصرخ بالثراء…أما أنا فكنت واقفة هناك
علياء صابر زوجة عمرو المنصوري المدير المالي لمجموعة المنصوري القابضة
والظاهر إني كنت الست الوحيدة في القاعة اللي “مش عارفة مقامها”
على الأقل ده اللي عمرو كان فاكره…على الطرف التاني من القاعة كان واقف جنب زميلته صاحبته القديمة من أيام الجامعة الست اللي عمره ما كان بيقدمها لحد غير وهو بيضحك وفي صوته حنية زيادة عن اللزوم
كان دايمًا يقول..”ياسمين تعرفني وتفهمني احسن من أي حد” “دي بكل عيلتي بحالها”
ياسمين كانت لابسة فستان أزرق فاتح من ماركة عالمية وشعرها نازل على كتفها في تموجات ناعمة وفي حضنها طفل صغير ملفوف في بطانية بيضا فاخرة
خدوده موردة وإيديه الصغيرة بتتحرك في الهوا
واسمه مكتوب بحروف دهب على كل الكروت الموجودة فوق الترابيزات
آدم من غير اسم أب ومن غير أي أسئلة
الضيوف كانوا بيتعاملوا مع الموضوع كأنه لغز لطيف
والأغنيا بيحبوا الأسرار طول ما هي متغلفة بالحرير
عمرو انحنى ناحية الطفل
وفي اللحظة دي شفت على وشه حاجة عمري ما شفتها قبل كده…فخر..انبهار…امتلاك
عينيه رقوا بطريقة عمرهم ما رقوا وهو بيبصلي
مد صباعه ولمس خد الطفل برقة…معدتي اتقبضت
أربع سنين كاملة وأنا مستنية النظرة دي
أربع سنين جواز
أربع سنين دكاترة وتحاليل ومواعيد وتأجيل أحلام
أربع سنين حماتي الحاجة تبصلي وكأني السبب في إن العيلة لسه مالهاش وريث..أربع سنين عمرو يقول قدام الناس..”إحنا بنحاول”
وفي السر يسيب اللوم كله يقع عليا
مع إن الحقيقة كانت مختلفة تمامًا..هو تقريبًا ماكانش عنده فرصة طبيعية للخلفة..انا كنت عارفة..والدكتور كان عارف..حماتي كانت عارفة…فاكرة اليوم اللي استلمنا فيه النتيجة…عمرو قعد يعيط في حضني وقال “أرجوكي ما تقوليش لحد””أمي مش هتستحمل الفضيحة”
فسكتوشربت الأعشاب اللي حماتي كانت بتجبرني عليها
واستحملت تلميحاتها الجارحة وخليت الناس كلها تعتبرني أنا العقيمه عشان أحمي الراجل اللي كنت بحبه
