ثلاث بنات حكايات رومانى مكرم 2
مريم الكبيرة زعقت: “في إيه يا بابا؟”
حسام بصلي وقال بصوت جامد خالي من أي رحمة:
“البنات دول هيجوا معايا.. هعيشهم فوق مع منى وولادي، وأنتِ هتقعدي هنا لوحدك.. ومفيش بنت من بناتك هتشوفيها ولا تلمسيها، لحد ما تحطي عقود الأرض والدهب في إيدي ورجلك فوق رقبتك!”حكايات رومانى مكرم تابعو صفحه رومانى مكرم
الدنيا لفت بيا، وحسيت إن النفس اتقطع من صدري. البنات كانوا بيصرخوا وبيستنجدوا بيا، وليان الصغيرة شبطت في جلابيتي وهي بتبكي برعب: “متمشيش يا ماما.. متخليش بابا ياخدنا!”
حسام زقني بقوة لما حاولت أقف في طريقه، وبدأ يجر البنات وراه لبرة الشقة وهو بيقول بقسوة: “يلا قدامي.. مفيش قعاد هنا تاني.”
وقفت في نص الصالة، وشفت بناتي بيتاخدوا مني غصب، والباب اتقفل وراهم. للحظة حسيت إن روحي بتتسحب، وركبي مش شايلاني. قعدت على الأرض وأنا بصرخ بهستيريا، وصوت عياطهم كان لسه بيرن في وداني من السلم.
طلعت جري وراهم، ووقفت قدام شقة منى فوق، وفضلت أخبط بكل قوتي لحد ما إيدي اتجرحت: “افتح يا حسام! رجعلي بناتي يا حسام، متعملش فينا كده!”
الباب اتفتح، بس مش حسام اللي ظهر.. دي كانت منى.
بصتلي بنظرة شماتة وغل، وقالت ببرود: “وفري مجهودك يا نجلاء.. حسام قال مفيش نزول للبنات، ومن هنا ورايح أنا اللي هربيهم، لحد ما تشوفي مصلحتك وتديله اللي هو عاوزه.. البيوت للي بيعمروا فيها ويجيبوا الولد، مش اللي بيخلفوا بنات ويقعدوا يعاندوا.”
قفلت الباب في وشي. رجعت شقتي وأنا مكسورة كسر عمري ما حسيته، بس وسط الدموع والوجع، افتكرت وصية أبويا تاني: “الأرض دي أمانة.. وسند لبناتك”. لو اتنزلت عنها النهاردة، حسام مش هيرجعلي بناتي، بالعكس.. هيضمن إني بقيت من غير ضهر ولا سند، وهيذلني بيهم العمر كله.
قعدت لحد الفجر صاحية، وعقلي شغال زي الماكينة. مسحت دموعي وقلت: “الدموع مش هترجع بناتي.. لازم أكون قوية.”
أول ما الشمس طلعت، لبست عبايتي ونزلت بسرعة قبل ما حد يشوفني. مروحتش الأرض، ولا روحت لأهله.. أنا روحت لمركز الشرطة.
دخلت وعملت محضر رسمي “عدم تعرض وإثبات حالة بانتزاع الأطفال”. المحامي بتاعي، أستاذ أشرف، اللي كان صاحب أبويا الله يرحمه، جه أول ما كلمته.
أستاذ أشرف بصلي باحترام وقال: “متخافيش يا نجلاء.. القانون معاكِ، وحق الحضانة للبنات معاكِ بقوة القانون لأنهم قصر، ومحدش يقدر يحرمك منهم، حتى أبوهم.”
طلعنا على النيابة، والمحامي قدم طلب عاجل لقرار تمكين من الحضانة وتسليم الصغار.
