دولابى حكايات رومانى مكرم 1

“اقعدي يا سميرة… اقعدي وأنا هفهمك كل حاجة.”

أول ما قال “هفهمك كل حاجة”، حسيت بركبي سابت. قعدت على طرف السرير وأنا كلي بترعش، وعيني مش مفارقة وشه اللي بقى لونه أصفر زي الليمونة.

أحمد قعد على الكرسي اللي قبالي، حط كفوف إيده بين راسه، وأخد نفس طويل كأنه بيستجمع شجاعته، وقال بصوت واطي جدًا:

“مروة أختي مش بس كانت عايشة هنا قبل ما نتجوز… مروة هي اللي كانت شارية الشقة دي معايا.”

صدمتي لجمت لساني، فضلت باصة له ومبرقة. كمل وهو مش قادر يحط عينه في عيني:

“قبل ما أتعرف عليكي، أنا ومروة كنا داخلين جمعية وشغل سوا، والشقة دي كانت باسمنا إحنا الاتنين… ولما قررت أتجوزك، هي وافقت تسيب الشقة وتتجوز في بيت عيلة جوزها، وقالت لي سدد لي حقها على مهلك… بس أنا لسه مسددتش كل الفلوس.”

وقفت فجأة وأنا مش شايفة قدامي:

“يعني إيه؟ يعني أختك ليها حق في الأوضة اللي أنا نايمة فيها؟ في البيت اللي أنا بنظفه وبفرشه؟!”

أحمد قام بسرعة وحاول يمسك إيدي:

“يا سميرة افهمي، مروة بتمر بمشاكل كبيرة مع جوزها الأيام دي، وشكلهم هيطلقوا، وهي جاية تفرض سيطرتها وتفكرني إن الشقة دي بتاعتها زي ما هي بتاعتي… الحركة اللي عملتها في الدولاب دي مش عشان الهدوم، دي كانت بتكسر مقاديفي ومقاديفك، بتثبت وجودها!”

ضحكت بوجع ودموعي نزلت:

“تثبت وجودها بإنها تفتح دولابي وتنقّي قمصان نومي؟! إنت مستوعب القرف اللي أنا فيه؟ إنت سكتّ ليه قدامها؟ ليه م وقفتهاش عند حدها؟”

أحمد اتنرفز هو كمان بس بنبرة عاجزة:

“عشان لو وقفت ضدها دلوقتي هتقولي هات فلوسي، وأنا معيش! هتقولي هقعد في الشقة، وليها حق قانوني… أنا كنت بداري على خيبتي عشان المركب تسير!”

بصيت له ودموعي على خدي، الكلام نزل عليا زي الميّه الساقعة. في لحظة، البيت اللي كنت شيفاه أماني ومملكتي، حسيت إنه مجرد إيجار مؤقت من أخته.

وقبل ما أرد عليه، تليفونه اللي على السرير رن… بصينا إحنا الاتنين للشاشة.

كانت “مروة”.

أحمد بصلي بخوف، ومسك التليفون وفتح السبيكر وإيده بتهتز.

صوت مروة طلع من السماعة، بس المرة دي مكنش فيه غضب… كان فيه صوت ضحكة خبيثة وباردة:

“أنا نسيت أقولك يا أحمد… أنا كلمت المحامي، وبكرة الصبح هكون عندكوا في الشقة عشان نقعد ونشوف هنحل موضوع نصيبي ده إزاي… جهزوا نفسكوا.”

الخط قطع… وأنا وأحمد بصينا لبعض، والدنيا لفت