ورثي حكايات رومانى مكرم 1

رميت نفسي على الكرسي وانفجرت في البكاء. بكيت على الأمان اللي كنت فاكرة إني لاميّاه في بيتي، بكيت على سنة كاملة عشتها مع بني آدم كنت فاكراه ضهري، وطلع أول ما شّم ريحة الفلوس اتغير. نمت ليلتها وأنا حاضنة نفسي، وصوت أبويا الله يرحمه مش بيفارقني: *”خلي معاكي حاجة تسندك يا بنتي.”*

مر أسبوع كامل.. تليفوني مرنش منه ولا رنة. مبعتش حتى رسالة يسأل عليا. وفي المقابل، أهله بدأوا يتدخلوا. حماتي كلمتني في التليفون، وبدل ما تطيب خاطري، لقيتها داخلة فيا حامية:

“بقى إنتِ يا بنت الأصول تكسري بكلمة ابن الراجل قدام الغرب؟ بقيتوا بتعملوا حساب للفلوس وتنسوا الأصول؟ ابن الناس زعلان وفي بيت أبوه، وإنتِ قاعدة ولا همك!”

رديت عليها بأدب بس بحسم: “يا طنط، أنا مكسرتش بكلمته، أنا طلبت حقي. الفلوس دي ورثي أنا، وأنا موافقة نشتري الشقة ونعيش فيها سوا، بس تتكتب باسم اللي دفع تمنها. هو اللي زعل عشان مقدرش ياخد حاجة مش بتاعته.”

قفلت معايا وهي بتدعي وتتحسبن، وعرفت إن الموضوع مش هيعدي بالساهل.

بعد يومين، لقيت جرس الباب بيرن. فتحت ولقيت جوزي واقف.. ملامحه كانت متغيرة، باهتة، ومفيش فيها العصبية بتاعة المرة اللي فاتت. دخل وقعد من غير ما يتكلم، وأنا قعدت قصاده مستنية أشوف آرت الأيام اللي فاتت جاب معاه إيه.

بص في الأرض وقال بصوت هادي:

“أنا فكرت في كل اللي حصل يا بنت الناس.. وعشان ننهي الخلاف ده، وعشان أثبتلك إنك ظلمتيني وإني مش طمعان فيكي، أنا عندي حل يرضي كل الأطراف.”

رفعت حاجبي وقلتله: “سامعاك.. إيه هو الحل؟”

طلع ورقة وقلم من جيبه وحطهم على الترابيزة وقال:

“الشقة تتكتب باسمنا إحنا الاتنين.. بالنص. النص باسمك عشان دي فلوسك، والنص باسمي عشان أنا الراجل وم ينفعش أعيش في شقة مراتي، وعشان الولاد يحسوا إن أبوهم ليه كلمة في البيت ده.. وبكده نبقى قسمنا البلد نصين ومحدش فينا زعل.. إيه رأيك؟”

بصيت للورقة والقلم، وبصيت لوشه اللي كان بيحاول يبان فيه الطيبة والعقلانية.. بس في اللحظة دي، افتكرت كلام صاحب الشقة في المكتب: *”الست دي اتكلمت معايا وعرفت إن الفلوس ورث أبوها.”* واكتشفت إن جوزي لسه بيلف ويدور.. لسه عايز ياخد 700 ألف جنيه من ورث أبويا من غير ما يدفع فيهم مليم واحد، وتحت مسمى “الرجولة والأصول”!

ضحكت ضحكة خفيفة فيها وجع، وقلتله:

“طب إيه رأيك بقى في الحل الأحسن من ده كله؟”

بصلي بلهفة وقال: “إيه هو؟”

وقفت وقلتله:

“أنا مش هشتري الشقة دي خالص.. أنا هروح بكرة الصبح أشتري بالمليون و400 ألف جنيه دول كلهم دهب، وأشيلهم في صندوق في البنك باسمي.. والبيت اللي إحنا مأجرينه ده هنفضل فيه، وإنت الراجل ومسؤول تدفع إيجاره ومصاريفه كاملة من جيبك وشقاك.. والشقة اللي كنت عايزني أشتريها بتعب أبويا عشان تضمن مستقبل الولاد، سيب مستقبل الولاد عليك بقى.. وريني شقاك إنت هيعملهم إيه!”