خزلان حكايات امانى السيد 4
المحامي كمل: “الحاج عبد العزيز مكنش ليه أولاد، وهو اللي كان مستضيفك في المستشفى بعد الحريقة وسأل على تفاصيل الحادثة وعرف إنك انقذتي طليقك وفديتيه بالنار. الراجل اتأثر جداً بقصتك، ولما عرف باللي أحمد عمله وطردكم وهروبهم، كتب في وصيته إن الشقة الكبيرة اللي كنتوا مأجرينها في وسط البلد، ومعاها المحل التجاري اللي تحت العمارة، يتنقلوا لملكيتك الخاصة كتعويض وتقدير لشجاعتك وأصلك النضيف.”
دموعي نزلت من المفاجأة.. ربنا مبيسبش حق حد، بيقفل باب ويفتح أبواب مكنتش على البال. استلمت الأوراق الرسمية، وبقيت أنا صاحبة الشقة والملك في نفس المكان اللي عشت فيه مكسورة.
قررت أنزل وسط البلد عشان أعاين المحل والشقة وأبدأ أجهز للمشروع الجديد اللي هعمله. وقفت قدام العمارة، وبصيت لفوق وأنا بفتكر كل حاجة، وفجأة لمحت خيال حد جاي من بعيد.. كان أحمد!
شكل أحمد كان يصعب على الكافر؛ هدومه دبلانة، والكسرة باينة في مشيته، وجاي يسأل البواب عم محمد على أي شغلانة أو لو فيه حد عاوز محاسب في المنطقة. أول ما عينه جت في عيني، اتسمر مكانه. بص لوشي المنور، وبص لهيئتي وثقتي، ونزل راسه في الأرض من الخجل والذل.
عم محمد البواب أول ما شافني، جري عليا وقال بصوت عالي عشان أحمد يسمعه: “يا مرحب يا ست هانم.. يا مرحب بصاحبة الملك والشقة والعمارة كلها! نورتي بيتك ومطرحك.”
أحمد رفع راسه وبصلي وعينيه برقت بالصدمة والذهول، وقال بصوت متقطع: “صاحبة الملك..؟ أنتِ بقيتي صاحبة الشقة والمحل يا مدام؟”
قربت منه خطوتين، بكل كبرياء، وبصيت له من فوق لتحت وقولتله: “أيوة يا أحمد.. الشقة اللي هربت منها بالليل زي الحرامي، والمحل اللي كنت بتحلم تأجره زمان، بقوا ملكي أنا.. لوحدي. شفت تدابير ربنا؟ أنت هربت للتجمع عشان تستخسر فيا القرش والعلاج، فربنا طردك من شغلك ورجعك على البلاط، وأنا اللي فديت وضيعت عشانك، ربنا عوضني بالصحة والجمال والملك.”
أحمد وقع على ركبه في الشارع قدام الناس وعيط بحرقة وهو بيقول: “أنا اتهديت يا مدام.. أمي ماتت من قهرتها الأسبوع اللي فات، وأختي قاعدة في البيت مريضة ومحدش بيعبرها، وأنا بلف على لقمة العيش ومش لاقيها.. أرجوكي سامحيني واشغليني عندك في المحل الجديد.. اعملي فيا ثواب.”
بصيت له بالنظرة الأخيرة، نظرة مفيهاش حتى غل، فيها مجرد شفقة على بني آدم باع نفسه للشيطان فخسر الدنيا والآخرة، وقولتله بصوت قوي وهادي:
“أنا مبشغلش عندي بياعين ولا ناس ملهمش أمان يا أحمد.. اخرج من الشارع ده ومشوفش وشك هنا تاني.”
