حكايات منى السيد 2
« كده يا نادية؟ تكسري فرحتي في ليلتي وتعمليلي فضيحة وسط أصحابي وأهل جوزي؟ بقى أنا أتشمت فيا عشان غويشة؟! »
جوز سمر اتدخل وقال بنبرة حادة لمدحت:
« اتفضل يا مدحت.. خد العلبة دي والغويشة دي.. إحنا مانقبلش هدية تيجى بالمشاكل والسرقة، وتخلي شكلنا وحش قدام الناس! »
مدحت بص للعلبة القطيفة الحمرا اللي جوز سمر رماها على الترابيزة بكبرياء، وبصلي وهو حاسس بنهاية رجولته ومنظرته اللي اتهدت تماماً.
أنا مشيت خطوتين، وأخدت العلبة من على الترابيزة، فتحتها وبصيت للغويشة.. الذهب بيلمع، بس لمعته المرادي كانت بطعم انتصاري.
بصيت لمدحت وسمر وقولت بلهجة حاسمة:
« الغويشة دي هتقعد معايا.. وبكرة الصبح يا مدحت، هتنزل معايا الصاغة، المحل اللي اشتريت منه، نرجعها ونرد الفلوس للفيزا بالمليم، والبنك يبعتلي رسالة بالإلغاء.. وتدفع أنت مصاريف الاسترداد والفوائد اللي نزلت! »
مدحت بص الأرض وهو ساكت ومش قادر ينطق بكلمة قدام أخته وجوزها.
لكن عمته اتدخلت وقالت بخبث: « وطالما رجعت الغويشة والفلوس هترجع، خلاص بقى يا نادية، الموضوع ينتهي لحد هنا ومتكبريهاش، والصلح خير.. »
بصيت لعمته وابتسمت ابتسامة هادية ومرعبة في نفس الوقت، وقولت:
« لا يا طنط.. الموضوع مخلصش.. ده يلا دوب بدأ.. »
عم الفراغ والهدوء المرعب في الأوضة بعد كلمتي. الكل كان بيبص لي ومستني يسمع إيه اللي في دماغي تاني بعد ما خلاص ضمنت إن حقي وفلوسي هيرجعوا.
مدحت رفع رأسه وبص لي وعينيه كلها غل وتوجس:
« بدأ إزاي يعني يا نادية؟ الغويشة وهترجع بكرا الصبح والفلوس هتترد للبنك.. عايزة إيه تاني؟ »
حطيت علبة الذهب في الشنطة بتاعتي وقفلتي السوستة بقوة، وبصيت له وبصيت لأهله اللي واقفين يراقبوا:
« عايزة كرامتي اللي افتكرت إنك ممكن تدوس عليها وتعدي. الفلوس دي حق البنك وهي ترجع للبنك، إنما حقي أنا في البيت ده قصة تانية. من هنا ورايح، مفيش مليم واحد من مرتب شقايا هيدخل في البيت ده يا مدحت. مصاريف البيت، الإيجار، الفواتير، والأكل والشرب.. من الألف للياء هتبقى عليك لوحدك، زي ما الشرع بيقول، وزي ما “الرجالة بجد” بتعمل! »
عمته شهقت وحطت إيدها على صدرها:
« جرا إيه يا نادية؟ أنتِ عايزة تخربي بيتك بإيدك؟ الراجل ظروفه على قده وأنتِ عارفة البير وغطاه، هيروح يسرق عشان يصرف على البيت لوحده؟ »
التفت لها وقولت برود:
« لما كان عايز يتمنظر قدام المعازيم ويطلع شهم، مكنش ظروفه على قده يا طنط! اللي يقدر يلتزم بأقساط وفوايد 45 ألف جنيه عشان “اللقطة” والمظاهر، يقدر يشيل بيته ومراته من غير ما يمد إيده على شقاها. »
