عندي 35سنه حكايات رومانى مكرم 1
لحد ما ظهر كريم.
فاكرة أول مرة شوفته فيها، في مكتبه الصغير وسط البلد. المروحة بتصدر صوت مزعج، والحيطان مليانة ملفات قديمة. كنت رايحة أطلب استشارة طلاق بس.
لكن أول ما حكيتله كل حاجة، سكت دقيقة كاملة.
وبعدين قال: “إنتِ عايزة تهربي… ولا عايزة تخلصي منه نهائي؟”
السؤال خوّفني وقتها.
لكن الغريب إني جاوبت فوراً: “عايزة أضمن إنه مايأذيش ولادي أبداً.”
ومن يومها… بدأ كل شيء.
كريم كان أذكى مما توقعت.
عرف إن سامح عنده قضية قديمة متقفلة، وإن في ظابط مكافحة مخدرات مستني أي غلطة يمسكه بيها. بدأ يخطط بهدوء، وأنا كنت عينه جوه البيت.
صور. تسجيلات. مواعيد. أسماء.
كنت بخاف كل يوم.
وفي كل مرة سامح يقرب مني، كنت بحس إني عايشة مع قنبلة هتنفجر.
لكن الأسوأ… إن علاقتي بكريم بدأت تتغير.
في الأول كان مجرد محامي.
بعدها بقى الشخص الوحيد اللي بيسمعني.
حكايات رومانى مكرم
الوحيد اللي لما أبكي قدامه مايحسسنيش إني ضعيفة.
ومرة… بعد ما سامح ضربني قدام العيال بسبب مكالمة تليفون، خرجت أجري من البيت الساعة اتنين الفجر، وروحت مكتب كريم.
فتح الباب وهو مصدوم. “داليا؟”
أول ما شاف شفايفي المتورمة، وشه اتغير.
دخلني المكتب من غير كلمة، جاب تلج، وفضل ساكت وهو بيعالج الجرح.
وفجأة… انفجرت في العياط.
كنت مرعوبة، مكسورة، تعبانة.
وهو… حضني.
اليوم ده كان بداية المصيبة الحقيقية.
لأننا بعدها بقينا مش بس شركاء في خطة…
بقينا بنخون سامح.
بعد أسبوع من الحكم، بدأت أحس إن في حاجة غلط.
كنت قاعدة بالليل في أوضة الأطفال، يوسف نايم على رجلي، والبنت الصغيرة ملك نايمة جنبي.
وفجأة… موبايلي رن.
رقم غريب.
رديت بتردد: “ألو؟”
الصوت اللي سمعته خلّى الدم يتجمد في عروقي.
“فاكرة إنك انتصرتي يا داليا؟”
سكتُّ.
الصوت كمل وهو بيضحك ضحكة واطية: “سامح عرف كل حاجة.”
قومت واقفة فوراً.
قلبي بيدق بعنف. “مين معايا؟!”
لكن الخط اتقفل.
#الكاتب_رومانى_مكرم
في اللحظة دي، وصلت رسالة.
فتحتها…
واتسعت عيني بصدمة مرعبة.
كانت صورة ليا أنا وكريم.
الصورة متاخدة من بعيد… من قدام مكتب المحامي… ليلة ما حضنّي.
وتحت الصورة مكتوب:
“لما سامح يخرج… هيبدأ بقتل المحامي. بعده هيجيلك الدور.”
