بقالى شهرين حكايات رومانى مكرم 2
وقفت مكاني مذهولة، والدم هرب من عروقي. بصيت لكريم وأنا مش مصدقة الجبروت والتبلي اللي بسمعه. ذهب إيه وفلوس إيه اللي حماتي لقتهم؟! أنا ماليش في الشقة دي غير هدومي وجهازي اللي أهلي جايبينه بشقاهم.
أمي بصتلي بصدمة وقالت: “ذهب إيه يا سارة؟ وفلوس إيه اللي مخبياها عن جوزك؟ هو في إيه يا بنتي بالظبط؟”
قبل ما أنطق، كريم زعق تاني وقال: “اسألي بنتك يا طنط! أمي دخلت الشقة الصبح تقرأ قرآن وتفتح الشبابيك عشان تدخل الشمس، لقت علبة قطيفة حمراء مستخبية ورا الهدوم في آخر الدولاب، وفيها غوايش ذهب ومبلغ كبير.. ولما كلمتني وقولتلها ماليش علم بيهم، قالتلي يبدو إن الهانم بتشيل قرشين من ورايا، أو الله أعلم الحاجات دي جات منين!”
كلمة “جات منين” دي كانت السكينة اللي ذبحت كرامتي. بصيت لكريم بعينين مليانة شرار، والضعف والكسرة اللي كانوا فيا من امبارح اتمحوا تماما وحل مكانهم غضب يعمي.
قربت منه وقولت بصوت قوي هز الصالة: “الحاجات دي جات منين؟! إنت بتطَعن في شرفي يا كريم؟ في شرف مراتك اللي متجوزها بقالك شهرين؟”
كريم اتوتر شوية من نبرتي، بس كبرياؤه وعماه ورا كلام أمه خلوه يكمل: “أنا مابظلمكيش، الحاجة لسه موجودة في الشقة وأمي قفلت عليها.. اجهزي معايا حالا عشان نروح ونشوف الليلة دي فيها إيه.”
أمي تدخلت بسرعة وبأدب شديد بس بحزم: “يا كريم يا ابني، سارة بنتي متربية أحسن تربية، وعمرها ما تمد إيدها على حاجة مش بتاعتها، ولا تخبي عنك حاجة.. الموضوع فيه سوء تفاهم، وأنا هاجي معاكم بنفسي عشان نشوف إيه اللي بيحصل ده.”
كريم هز رأسه بالموافقة وهو بيبص في الأرض بغيظ. دخلت أوضتي ألبس، وإيدي كانت بتترعش بس المرة دي من الغضب مش الخوف. فتحت الموبايل بسرعة وبعت رسالة للرقم المجهول اللي بعتلي صورة (ندى) امبارح، كتبت فيها: “حماتي حطتلي ذهب وفلوس في الدولاب وبتتبلى عليا.. لو عندك علم باللي بيحصل ده ارجوكِ الحقيني.”
حطيت الموبايل في شنطتي وخرجت. طول الطريق في العربية مفيش مخلوق نطق بكلمة. كريم سايق وعينه في الأرض، وأمي بتدعي في سرها، وأنا عقلي شغال.. اللعبة واضحة، حماتي مش بس عايزة تفرض سيطرتها، دي عايزة تمسك عليا زلة تكسرني بيها قدام ابنها، أو تطردني وتطلعني أنا الغلطانة.. نفس السيناريو اللي اتعمل مع ندى!
وصلنا العمارة، ونزلنا. وأنا طالعة السلم حسيت إن رجلي تقيلة، بس استعذت بالله وقويت قلبي. كريم فتح الباب بالمفتاح اللي أمه أخدته مني امبارح.
