جوزي بعتلي 150 ألف 5
## الجزء التاسع: عاصفة الرماد
لمسة إيد يوسف لبنتها “أمل” وهي بين إيديه كانت زي البلسم اللي داوى كل الجروح القديمة. منة بصت للمشهد ده وحست لأول مرة إن ربنا بيعوضها عن كل لحظة ذل وخوف عاشتها. الأيام اللي بعد كده مرت زي الحلم؛ يوسف مكنش مجرد حبيب قديم، ده بقى السند الحقيقي اللي بيشيل مع كريم مسؤولية كل حاجة، وبيرسم الضحكة على وش أمل اللي اِتعلقت بيه وبقت تندهله “بابا يوسف”.
أعلنوا خطوبتهم في حفل عائلي صغير وبسيط، منة صممت فستانها بنفسها، وكان فستان رقيق وراقي بلون الفيروز. الكل كان فرحان، وكريم كان حاسس إنه أخيرًا بيسلم أمانته لإيد أمينة.
لكن الدنيا مابتسيبش حد في حاله، والشياطين اللي دخلوا السجن مكنش سهل عليهم يشوفوا منة وهي بتتبني من جديد وبتعيش المحنة كأنها منحة.
في سجن القناطر للنساء..
كانت نيرمين قاعدة في العنبر، وشها شاحب، وهدوم السجن الزرقا واسعة عليها ومتبهدلة بعد ما ولدت ابنها “سيف” جوة مستشفى السجن. الطفل كان نايم على دكة خشبية جنبها، بيبكي بصوت ضعيف من الحر وقرص الناموس.
جنبها، كانت الحاجة فاطمة قاعدة وضهرها محني تماماً، عياطها مبقاش بيقف، والطمع اللي كان مالي عينها اِتحول لكسرة وخزي.
دخلت السجانة وصرخت: “نيرمين عوض! عندك زيارة من محامي.”
نيرمين قامت بلهفة وفرحة، اِفتكرت إن في نقض قُبل أو مصيبة اِنزاحت. جِريت على غرفة الزيارة، لقت محامي شاب من طرف أبوها واقف ومستنيها.
نيرمين بلهفة: “أهلاً يا أستاذ.. طمني! أبويا هيرفع قضية ويخرجني؟ أحمد اعترف؟ في إيه؟”
المحامي بص لها بأسف وقدم لها ورقة من ورا السلك: “أنا جاي بناءً على طلب الحاج عوض.. دي ورقة طلاقك من أحمد عبد العزيز، هو مضى عليها في سجن الرجال بناءً على قضية الضرر اللي رفعناهالك.”
نيرمين صرخت: “أنا مش عايزة ورقة طلاق! أنا عايزة أخرج من هنا! ابني هيموت في السجن! فين الفلوس اللي أحمد كان مخبيها؟ فين محلات التجمع؟”
المحامي تنهد بقرف: “أملاك أحمد كلها اِتصادرت لصالح الدولة، والجزء اللي كان كاتبه باسمك وباسم والدته، طلع متباع لصندوق استثماري باسم ‘أمل’ بنت منة.. إنتي ووالدته م تملتوش مليم واحد برة.. وأبوكي بيقولك ابنك ده لما يكمل السن القانوني ويخرج من السجن، هو هيتكفل بيه، بس إنتي مالكيش دخول بيته تاني بعد ما جرصتيه في العيلة.”
نيرمين انهارات، بدأت تلطم على وشها وتصرخ وتخبط دماغها في السلك: “منة! كله بسبب منة! هي اللي أخدت الشقة وفلوس يوسف ودمرت حياتنا! مش هسيبها.. قسماً بالله ما هسيبها تتهنى!”
