بعد الصبر حكايات نورهان 1

بسم الله الرحمن الرحيم

بعد الصبر جبر بقلم نورهان العشري 

ـ تتجوزي! تتجوزي دا ايه؟ يادي العيبة! واحدة في سنك تفكر في الجواز؟ أنتِ عايزة الناس تاكل وشنا؟ بدل ما تعملي حاجة لآخرتك جاية تقولي عايزة اتجوز! دي تبقى فضيحة..

الجملة دي سمعتها من اختي اللي شقيت عليها و علمتهاو جهزتها و جوزتها و مش هي وبس. دي هي و تلاته غيرها كمان. المشكلة مكنتش في الجملة دي وبس.. دانا اكتشفت أن اللي ضيعت عمري عشانهم هما اللي خربوا حياتي..

اسمي زينات عندي اتنين و أربعين سنة أمي أتوفت و أنا عندي ١٥ سنة و سابتلي أربع اخوات غيري بنتين وولدين اول واحد سامي كان عنده ١٣ سنة، و اللي بعديه هبة كان عندها ١١ سنين و اللي بعديها سحر ٩ سنين و أخرهم علي ٦ سنين. والدي اتوفى قبل ما يشوف علي دا. كانت أمي لسه حامل فيه. بعد ما اتوفت أمي حاوطت على أخواتي وطلعت اشتغلت في كل حاجة عشان اقدر أصرف عليهم. مرة في مواسم الجمع قطن أو فاكهة، و مرة في المباني مع الستات اللي بتروح تشيل مونة. مكنش حياتنا غير الشقة الأوضتين و صالة هي اللي كانت لمانا، الدنيا خبطتني كتير اوي و بكيت أضعاف ما ضحكت. ياما نمت من غير عشا، و كنت اضحك في وش أخواتي وانا قلبي بيبكي.

وانا عندي عشرين سنة ربنا كرمني و اشتغلت في مشغل صاحبته كانت ست طيبة، صعبت عليها و ساعدتني و علمتني الخياطة و مشتملاتها و ربنا كرمني و بقيت اشتغل في المشغل طول النهار ولما أروح الناس تجيبلي هدومهم اللي عايزة تضيق و اللي عايزة رفية و اللي عايزة تتقصر. 

ربنا كرمني و ساعدت أخواتي و محوجتهمش لحد. اشتغلت و اتمرمطت و طفحت الدم عشان خاطرهم. كنت بجوع نفسي عشان ياكلوا هما. اخواتي البنات كنت بجيبلهم أحسن لبس وانا افضل لابسه الطقم من الموسم للموسم. 

لما كنت ابقى عيانه وحد فيهم محتاج حاجة كنت أديله فلوس الدوا وانا مش مهم. مكنتش عبيطة وأنا بعمل كدا. لكن كنت بحبهم. كنت معتبراهم ولادي، و كنت أشوف الفرحة في عنيهم الدنيا كلها تضحكلي.

وانا خمسة و عشرين سنة. شفت شاب أخو واحدة صاحبتي في المشغل كان في كل حاجة تتمناها أي بنت. متعلم واخد بكالوريوس تجارة وشكله حلو، طول بعرض، عارف ربنا وبيصلي، و بيشتغل محاسب في شركة. غصب عني زيي زي اي بنت حلمت أن الشاب دا يكون من نصيبي، بالرغم أنه أحسن مني في كل حاجة. و خصوصا اني مكنتش كملت تعليمي. 

غصب عني حبيته بالرغم اني عمري ما كلمته أنا كنت بتكسف اوي، ومعنديش وقت حتى أبص في مراية، و يشاء ربنا أن الدنيا لأول مرة تضحكلي و اتفاجئ بصاحبتي بتقولي أن اخوها دا عايز يخطبني..