كنت بدفع إيجار، 2
## الجزء الثالث: المواجهة والوجه الحقيقي
فتحت الباب وأنا مش مصدقة عيني.. رامي واقف ونهجه عالي، وشكله واحد مبيت نية مش كويسة. دخل الشقة من غير استئذان وهو بيبص يمين وشمال بنظرات كلها غل:
— “ما شاء الله.. قاعدة في الهدوء ومنعمة نفسك، وإحنا هناك البيت بيتهد فوق دماغنا!”
بصيت له ببرود وسندت على الباب:
— “جبت عنواني منين يا رامي؟ وأيه اللي جابك أصلاً؟”
ضحك بسخرية وقال:
— “سهلة.. “بريهان” شافت اللوكيشن اللي بعتيه لبنت خالتك الشهر اللي فات. المهم سيبك من ده كله، إحنا في مصيبة. أبوكي في المستشفى والديون غرقتنا، وأمي باعت دهبها عشان تفوق من ورطة الفواتير اللي أنتي سبتيها!”
ضحكت بمرارة:
— “الفواتير اللي “أنا” سبتها؟ ولا الفواتير اللي “أنت” وعيالك عملتوها؟ رامي، اخلص وقول عايز إيه.”
طلع من جيبه ورقة مطوية، وحطها على الترابيزة قدامي وقال بنبرة فيها تمثيل:
— “شوفي يا إيمي، البيت ده محتاج مصاريف، وبابا مش هيقدر يكمل سداد أقساط الأرض اللي ورا البيت. أنا لقيت مشتري للبيت كله، بس فيه مشكلة.. الشقة اللي كنتِ قاعدة فيها مسجلة باسمك “هبة” من بابا زمان عشان يضمن حقك. أنتي هتمضي على التنازل ده، وأنا هبيع البيت، وهديكي قرشين تسندي بيهم نفسك في الشقة الإيجار دي، والباقي هسدد بيه ديون البيت وآخد لأمي وأبويا شقة صغيرة تلمهم.”
بصيت للورقة ولقيتها مش مجرد تنازل، ده عقد بيع وشراء كامل لرامي نفسه وبمبلغ “صوري” مضحك. رامي عايز يلهف البيت كله لنفسه ويخرجني أنا وأبويا وأمي برا المولد بلا حمص.
قلت له وأنا بربع إيدي:
— “ولو ممضيتش؟”
وشه اتغير تماماً، وعروقه برزت:
— “لو ممضيتيش، أمك هتتحبس! الجمعية اللي كانت داخله فيها، هي مكسورة في وصلات أمانة، والناس مش هيرحموا. أنا حاولت أحلها ودي، بس أنتي طول عمرك أنانية وبتاعت مصلحتك.”
في اللحظة دي، تليفوني رن.. كانت أمي. فتحت الخط وفتحت السبيكر عشان رامي يسمع.
صوت أمي كان كله عياط:
— “إيمي.. رامي عندك؟ يا بنتي ما تسمعيش كلامه، رامي سرق وصلات الأمانة من شنطتي وبيهددني بيهم عشان يخليكي تمضي. هو اللي عمل الديون دي كلها يا بنتي، خد فلوس الجمعية وصرفها على مراته وسفرية الساحل اللي طلعها الشهر اللي فات وقال لنا إنه “شغل”!”
رامي اتخطف لونه وحاول يخطف الموبايل، بس بعدت عنه بسرعة وزقيته ناحية الباب:
— “يعني لا مشروع، ولا ديون بيت، أنت عايز تسرقنا عيني عينك يا رامي؟ وتلبس أمك في حيطة عشان تمضيلي؟”
