9 شهور حكايات رومانى مكرم 4
## الجزء السابع
الباب اتهد ووقع على الأرض بضربة رجل قوية، وعفرة التراب مَلت الأوضة الضلمة. محمود رفع طبنجته وإيده بتترعش، وأنا ضميت نفسي في ركن الأوضة وصريخي مكتوم في صدري.. كنت مستنية أشوف وش العصابة اللي محمود اتكلم عنها، مستنية الموت.
لكن لما التراب انقشع، ظهرت قامة طول بعرض، ووراها نُور كشافات العربيات اللي قالب ليل المكان نهار. مكنش حد من العصابة.. ده كان “رفعت”.
رفعت كان واقف وفي إيده سلاحه، وعينيه بتطق شرار، وجنبه اتنين رجالة من بتوعه ومعاهم “سيد” البياع اللي كان وشه مضروب ومتبهدل.
أول ما محمود شاف رفعت، صرخ فيه بجنون: “أنت إيه اللي جابك هنا؟ اخرج برة.. دي مراتي ودي عيلتي، وأنت ملكش صالح بينا!”
رفعت متكلمش.. في لمح البصر، قرب وزق إيد محمود اللي فيها الطبنجة لفوق، وطلعت طلقة في السقف هزت الحيطان، وفي ثانية كان محمود على الأرض، ورجالة رفعت مكتفينه وواخدين منه السلاح.
رفعت ساب محمود، وجري عليا.. قعد على ركبه في الأرض، وبص في وشي بلهفة وخوف حقيقي: “أنتِ كويسة يا سمر؟ عملك حاجة؟ لِمسك الحرامي ده؟”
هزيت راسي والدموع نازلة زي المطر: “أنا كويسة.. عيالي يا حج رفعت.. عيالي في البيت حصلهم حاجة؟”
رفعت مسك كتفي وطمني بصوته القوي: “عيالك في حضن أمك وأبوكي، والبيت حواليه رجالة بشنباتها محدش يقدر يقرب منه.. الواد “سيد” شاف العربية وهي بتخطفك ولمح نمرتها، وجالي جري على البيت، ومن ساعتها وإحنا قالبين الدنيا وراكم لغاية ما جبنا طريقكم.”
التفتنا إحنا الاتنين لمحمود اللي كان مرمي على الأرض، وشه في التراب وبيضحك ضحكة هيرستيرية كلها غل ويأس. زعق وهو بيبص لرفعت: “فاكر نفسك بطل يا حج؟ فاكر إنك أنقذتها؟ أنت ودِيتها في داهية هي وعيالها! الورق اللي في الأرض ده كان طوق النجاة الوحيد.. أحمد أخويا مش هيرحم حد، والناس اللي وراه هتحرق الحارة كلها لو العيلة دي مخرجتش من السجن!”
رفعت قرب من محمود، وضربه برجليه في جنبه وقاله بكل قسوة: “أحمد أخوك خلاص اتفرم يا محمود.. والناس الكبار اللي أنت خايف منهم، أحمد مرشد عليهم في النيابة بقاله ساعتين عشان ينجد رقبته من حبل المشنقة.. القضية مبقتش سرقة دهب يا فالح، أخوك طلع غرقان في مصايب السلاح، وهو اللي لبّس أمه وأخته معاها عشان يداري على فلوسه.. يعني اللعبة اللي أنت جاي تلعبها على سمر باسم الخوف، مكنتش عشان تحمي عيالك.. أنت كنت جاي تلوق دراعها وتخوفها عشان تطلع أمك الحرامية من الوحل!”
