حكايات اسما السيد 2
الفصل الثالث
فضلت أبص للدبلة في إيدي كأني أول مرة أشوفها.
الحرف المحفور تحت الخدش كان واضح رغم محاولة إزالته. “س”.
مش “سارة”.
لأن الخط مختلف. قديم. ومحفور بإيد حد كان متأكد إن الاسم ده هيفضل للأبد.
نفسي اتقطع.
رفعت الدبلة قدام النور أكتر. ولقيت فعلًا أثر حروف اتمسحت بعنف.
يعني الدبلة دي ما اتعملتش مخصوص ليا.
اتعملت لواحدة قبلي.
وهم غيروا الاسم وخلاص.
قلبي وجعني بطريقة غريبة. مش علشان الدبلة نفسها… لكن علشان الإحساس إني مجرد بديلة. تفصيلة. أي بنت تملى الفراغ وخلاص.
قعدت على طرف السرير وأنا حاسة الدنيا بتلف.
أمي دخلت الأوضة بهدوء. أول ما شافت شكلي قالت بقلق: — مالك؟
مدّيتلها الدبلة من غير كلام.
أخدتها… ودققت فيها ثواني.
ولأول مرة من بداية اليوم… شفت الصدمة على وشها.
همست: — يا نهار أبيض.
صوتي خرج مكسور: — أنا كنت لابسة دبلة واحدة تانية يا ماما.
أمي ضغطت على شفايفها بغضب. — الواضح إنهم مستعجلين يخلصوا أي جوازة والسلام.
الوجع اتحول فجأة لغضب حارق.
افتكرت سهير وهي مصممة نجيب الشبكة من عند “المحل اللي تعرفه”. افتكرت إنها رفضت أختار أي تصميم. وقالت: — إحنا عندنا ذوقنا الخاص.
وقتها افتكرتها سيطرة عادية.
دلوقتي؟ بدأت أحس إن في بنت تانية كانت في حياتهم… واختفت.
ولسه أثرها موجود.
قلت بسرعة: — مين “س” دي؟
أمي هزت راسها. — مش عارفة… بس واضح إن في حاجة مستخبية.
بصيت للموبايل. الرسالة المجهولة لسه قدامي.
“لو عايزة تعرفي الحقيقة عن سهير وكريم…”
قشعريرة عدت في جسمي.
أمي قالت بحزم: — مش هتروحي لوحدك.
— بس يمكن الشخص ده يعرف حاجة مهمة.
— ويمكن يبقى حد مؤذي.
كنت عارفة إنها خايفة. بس فضولي وخوفي كانوا أكبر.
طول الليل ما نمتش.
كل ما أغمض عيني أشوف كريم وهو شايل أمه قدام الناس. أو أشوف الحرف المحفور في الدبلة.
ومع كل ذكرى… كنت بحس إني ماكنتش فعلًا “العروسة”.
كنت مجرد دور بيتعاد.
الصبح صحيت على صوت خناق برا الأوضة.
آدم.
فتحت الباب بسرعة لقيته متعصب بشكل مرعب وماسك موبايله.
أول ما شافني قال: — الحيوان ده منزل بوست!
خدت الموبايل منه بسرعة.
كان حساب كريم.
كاتب: “أوقات أهل العروسة بيكبروا المشاكل ويدمروا فرحة بنتهم بإيديهم.”
شهقت.
التعليقات كلها مولعة.
“واضح إن العروسة مدلعة.”
“الراجل ماعملش حاجة غلط.”
“الأم خربت الجوازة.”
دموعي نزلت من القهر.
هو فعلًا بيحاول يطلع نفسه الضحية.
أمي خرجت من المطبخ أول ما سمعت صوتنا. خدت الموبايل… وقرت البوست كامل.
